Korçarët e futbollit kanë filluar të jetojnë delirin e të qenit lider dhe kjo reflekton në një lloj arrogance që të prish humorin. Që në fillim të kësaj jave drejtuesit e Skënderbeut kanë hapur faqet e gazetave dhe lajmet sportive në ekranet e televizioneve me masat e tyre pedante, duke bërë të ditur se tashmë janë kampionë të mëdhenj dhe vetëm duhet të dëgjohen. Sebino Plaku u pezullua, megjithëse është një pjesë e mirë e historisë së re të Skënderbeut, ndërsa përsa i përket kapitenin Shkëmbi, me këtë lloj brutaliteti po tregojnë mungesë të theksuar respekti. Nja dy vjet më parë propozuan t’i vinin emrin e tij stadiumit të qytetit, gjë që ishte vërtetë e tepërt, ndërsa tani e llogarisin si zgjedhje të pestë në formacionin e titullarëve. Atëherë ishte në delir vetë Shkëmbi, i cili nuk nguronte të fyente një legjendë si Jani Kaçi, të cilit i dukej shumë i vogël emri i mesfushorit për përmasat e stadiumit. Ndërsa tani, presidenti Takaj deklaron se kapiteni e ka pranuar stolin, ndërkohë që ky i fundit e refuzon me vendosmëri një gjë të tillë. Askush nuk e di me saktësi se çfarë ka ndodhur, që Bledi Shkëmbi, i cili disa muaj më parë luante në kompeticionet më të rëndësishme të kontinentit, tani trajtohet sikur të mos kishte qenë kurrë pjesë e kësaj skuadre. Ose ka mjaftuar një periudhë kaq e shkurtër që një numri 10 i “uqërve” të ketë mbaruar përfundimisht, gjë e vështirë për t’u besuar, ose pesë vjet rresht kampion kanë qenë shumë për drejtuesit e Skënderbeut që të vazhdojnë përmbajnë veten.
