Që nga fillimi i pandemisë, 8 punonjës policie në qarkun e Tiranës janë konfirmuar pozitivë me COVID. Të infektuarit shërbenin pranë recepsioneve të policisë dhe te pritja e qytetarëve. Një pjesë e tyre kanë infektuar edhe familjarët. Pasi u konfirmuan pozitivë, efektivët u vetë izoluan”.
Personi i fundit që u konfirmua me koronavirus brenda radhëve të uniformave blu ishte një efektiv i Shqiponjave. Burime zyrtare pranë policisë, konfirmuan për “ABC News” se ai rezultoi me COVID-19 vetëm tre ditë më parë. Mësohet se nga hetimi epidemiologjik ka rezultuar se efektivi i Shqiponjave është infektuar gjatë punës në terren, teksa ka shoqëruar qytetarë të ndryshëm në komisariate. Në dy ditët e fundit, autoritetet shëndetësore u kanë bërë tamponët kolegëve të oficerit të infektuar dhe të afërmve të tij, të cilët kanë rezultuar negativë.
Edhe të infektuarit më herët ishin punonjës policie të cilët shërbenin tek pritja e qytetarëve. I tillë ishte edhe rasti i një 49 vjeçari, që shërbente në recepsionin e Drejtorisë Vendore të Policisë së Tiranës. Pak javë më parë ai u prek nga virusi i ri teksa ishte në krye të detyrës, duke infektuar edhe familjarët.
/ABC News/
