Sot shënohen 4 vite nga koalicioni PS-LSI i cili u firmos pikërisht më 1 prill. Por Kryetari i LSI-së, Ilir Meta, i pyetur nga gazetarët për vazdimësinë e koalicionit të cilit tashmë i mbaroi kontrata, ka shmangur komentin për këtë gjë dhe tha se shqetësimi kryesor është dalja nga situata që po kalon vendi, me opozitën në çadër.
Nga Shkodra ku ishte i panishëm Meta u shpreh se duhet të ndihmojmë në një dialog proaktiv politik që procesi përpara zgjedhjeve të kthehet në normalitet dhe shqiptarët të votojnë të qetë, në mënyrë të drejtë e të barabartë.
“Jemi përpara një momenti të rëndësishëm që është ai i kapërcimit të një ngërçi politik i cili mund të na çojë në një drejtim të gabuar. Ky është shqetësimi kryesor të ndihmojmë një dialog proaktiv politik që gjithë procesi i zgjedhjeve të ardhshme të hyjë në shinat e normalitetit dhe qytetarët shqiptarë të votojnë në mënyrë të qetë, të drejtë e të barabartë dhe vendi të ketë pas këtyre zgjedhjeve një moment të ri të forcimit të institucioneve dhe avancimit të reformave” tha Meta në një deklaratë për Ora News.
Po sa i arritshëm është ky dialog?
Ilir Meta: Padyshim që më shqetëson thellë. Besoj të gjithë ndjejnë një shqetësim. Ky është dhe një detyrim ti shërbejmë të gjithë dialogut dhe të tregojmë fleksibilitet dhe përgjegjshmëri për interes shumë më të madh sesa i secilit prej nesh dhe çdo force politike që është interesi i qytetarëve shqiptarë dhe i demokracisë dhe të ardhmes së vendit tonë.
A e ka një plan LSI dhe Meta si kryetar Kuvendi për ta zgjidhur brenda kësaj periudhe të shkurtër?
Ilir Meta: Të gjithë duhet të kontribuojmë sepse bëhet fjalë për një çështje të përbashkët të të gjithëve.
