Shqetësimi i radhës së drejtuesit të gjigandit Facebook janë beqarët. Mark Zuckerberg ka vendosur të ndihmojë të vetmuarit e shumtë të Facebook që të gjejnë “shpirtin binjak”. Deri më tani Facebook i dedikonte një hapësirë shumë të vogël statusit duke u kufizuar vetëm tek disa lloj përcaktimesh , si martesa, fejesa, lidhja, të qenit single apo edhe “është e komplikuar”, etj. Tanimë, 200 milionë përdoruesit e vetmuar të rrjetit do të kenë më shumë mundësi ta tejkalojnë këtë “fazë”.
Aplikacioni i ri do të projektohet për të ndërtuar “marrëdhënie kuptimplota dhe afatgjata” dhe jo vetëm lidhje. “Njerëzit tashmë përdorin Facebook për të takuar njerëz të rinj, dhe ne duam ta bëjmë atë përvojë më të mirë. Njerëzit do të jenë në gjendje të krijojnë një profil takimi që është i ndarë nga profili i tyre në Facebook dhe takimet do të rekomandohen bazuar në preferencat, gjërat e përbashkëta dhe miqtë e përbashkët”, thuhet në deklaratën e kompanisë.
