Ministri i Brendshëm, Saimir Tahiri ka zhvilluar një takim me ambasadorin e OSBE-së, Bernd Borchardt pas deklaratave të tij se në Shqipëri qarkullojnë 2 miliardë euro para droge.
Pas takimit, në një prononcim për mediat ambasadori i OSBE-së është shprehur se shifra e dhënë prej tij është keqkuptuar sepse ka qenë sipas raportimeve të vitit 2013. Madje Borchardt ka përgëzuar policinë për luftën ndaj drogës, edhe pse sipas tij duhen akoma përpjekje.
Ndërkohë ministri Tahiri është shprehur se priten rezultate spektakolare në luftën që nisi me Lazaratin dhe do të përfundojë në të gjithë Shqipërinë.
Tahiri: “Para 2013 nuk flitej për luftën ndaj kanabisit dhe shteti ndihmonte plantacionet. Policia e Shtetit më shumë se këshilla e moral ka nevojë për ndihmë konkrete.
Policia po Lufton e vetme. Lëreni policinë të punojë dhe do të kemi rezultate spektakolare. E nisëm me Lazaratin dhe do ta përfundojmë me gjithë Shqipërinë. Këtë vit përfundon ajo që kemi nisur në fillim të mandatit.”
