Çfarë premtoi kryeministri tri vite më parë në Dibër dhe biseda konfidenciale me Shkëlqim Canin (video)
Kur do të bëhet rruga e Arbrit? Kjo është pyetja e përsëritur rreth 100 herë nga dibranët gjatë komunikimit që kryeministri Rama pati sot me qytetarët, përmes facebook-t. Rama u përball me një sërë pyetjesh, komentesh, sulmesh për premtimet e pambajtura në këto tri vite të qeverisjes së tij. Një ndër premtimet e pambajtura është edhe ai për ndërtimin e Rrugës së Arbrit.
E ka bërë premtimin në pranverën e vitit 2013, kur shkoi në Dibër bashkë me Shkëlqim Canin e kandidatë të tjerë për deputetë të PS-së për zgjedhjet e 23 qershorit. Por, sot pas më shumë se tri vite, Rama nuk ka një përgjigje konkrete për Rrugën e Arbrit, veçse fjalët boshe e më të përsëriturat prej tij: “Do ta zgjidhim me PPP (Partneritet Publik dhe Privat” apo “fajin e ka Saliu”.
“Rruga e Arbrit nuk filloi, sepse PD la në parim një projekt me qeverinë kineze për të marrë borxhe, por ne nuk kemi nisur qeverisjen me mundësinë për të marrrë borxh, por me detyrimin për të shlyer një mal borxhesh. Ne do ta ndërtojmë Rrugën e Arbrit, në mënyrë që të mos krijojmë gropa të reja apo të hyjmë në aventura. Kemi negociuar me qeverinë kineze një formulë tjetër Partneritet publik privat dhe jo borxh”, tha sot Rama.
Por, çfarë premtoi më shumë se tri vite më parë më 12 qershor 2013?
“Kur vendosa ta përfshij, Shkëlqim Canin në projektin e Rilindjes i thashë se duhet të përfaqësonte Dibrën dhe më tha pranoj me një kusht, që të premtosh e të ndërtosh Rrugën e Arbrit. Të njëjtin kusht më vuri edhe kandidati tjetër Ulsi Manja. Jam sot këtu për t’iu premtuar se Rruga e Arbrit do të jetë projekti ynë strategjik në qeverisje pas 23 qershorit 2013…”
Këtë shtator Rama shkon sërish në Dibër për t’i kërkuar edhe një herë votën dibranëve.
Shkon atje me dy probleme të mëdha. I pari, padyshim është premtimi i pambajtur për Rrugën e Arbrit, të cilit i bashkohet edhe largimi i Shkëlqim Canit nga post i ministrit të Financave. Shkëlqim Cani nuk është më pjesë aktive e ekipit të Rilindjes, ndoshta edhe për shkak të premtimit të pambajtur për ndërtimin e Rrugës së Arbrit.
Problem i dytë i madh i Ramës është historia që la pas ish-kryebashkiaku socialist, Shukri Xhelili. Ai u shkarkua nga kjo detyrë për shkak të një videoskandali seksual, ku kërkonte favore seksuale në këmbim të vendeve të punës në bashki. Është një imazh krejtësisht i rrënuar i Rilindjes në Dibër. Por, padyshim problem kryesor i dibranëve është zhgënjimi me premtimin e pambajtur për Rrugën e Arbrit që i ka lënë ata të izoluar tërësisht nga pjesa tjetër e Shqipërisë.
