Serbi-Zvicër është një superndeshje që luhet në orën 20:00 në Kaliningrad dhe është e vlefshme për grupin E. Pas fitores 1-0 në ndeshjen e parë me Kosta Rikën, Serbia nëse fiton sot ka mundësinë që të kalojë në fazën tjetër. Por të mundësh Zvicrën nuk është e lehtë. Serbia vjen në një formë të mirë sportive dhe si rreshtim pritet të luajë me 4-2-3-1 ku ylli i skuadrës është Milinkovic Saviç.
Një ndeshje e cila mbart edhe emocione të mëdha për shqiptarët pasi me skuadrën helvete luajnë 4 futbollistë me origjinë shqiptare që sonte do kenë përballë Serbinë. Trajneri i serbëve Mladen Krstajic e cilëson një ndeshje të egër dhe sqaron: “Zvicrën e njohim mjaft mirë, i dimë pikat e forta por edhe pikat e dobëta. Do të jetë një ndeshje e egër”, e mbyll Krstajic.
Në kampin e Zvicrës me shumë mundësi trajneri Petkovic do konfirmojë formacionin e ndeshjes së parë ku barazuan me Brazilin dhe në fushë priten katër shqiptarë. Trajnerit Vladimir Petkoviç nuk i pëlqen roli i favoritit dhe deklaron: “Ne gjithmonë luftojmë për fitoren. Na duhet të përqëndrohemi në lojën tonë dhe të vrapojmë shumë ashtu siç bëmë ndaj Brazilit”, e mbyll Petkoviç.
Tre pikë ka Serbia në krye të grupit E dhe me nga një pikë janë Zvicra dhe Brazili.
