Hajredin Boja dhe Fatmir Isufi dy punonjësit e policisë që kanë qenë dëshmitarë të ngjarjes në komisariatin e Kamëz ku i arrestuari Arben Mici i vuri flakën komisariatit dhe më pas humbi jetën, janë lënë në burg.
Policët akuzohen për shpërdorim detyre lidhur me ngjarjen e ndodhur në datën 26 mars ku si pasojë e zjarrit humbi jetën i ndaluari Arben Mici i cili ishte autori i vënies së zjarrit të komisariatit. Të plagosur mbetën edhe Dilaver Idrizi një tjetër prej të ndaluarve dhe gjithashtu edhe vetë polici Hajredin Boja.
Ngjarja
Ngjarja u regjistrua më 26 prill, ku i riu Arben Mici ai që i vuri flakën me çakmak dyshekut të krevatit të qelisë. Si pasojë e pakujdesisë së efektivëve përgjegjës, Mici u la të futej në qeli me çakmak me vete, ndërsa po ashtu u gjetën edhe një paketë duhani me tetë filtra, ndërsa në trup iu gjetën nëpër xhepa pesë cigare dhe një paketë. Mici, i arrestuar pasi dhunoi të ëmën, ka qenë një person problematik, ndërsa në 5 vite ishte shoqëruar 22 herë në polici. Paraprakisht u dyshua se Mici e thuri planin e zjarrvënies bashkë me të arrestuarin tjetër, Dilaver Idrizin, me qëllimin për t’u arratisur, por pas hetimeve një tezë e tillë ka rënë. Vetë Idrizi deklaroi se zjarrin e kishte vënë Mici dhe se ai ishte nxjerrë jashtë qelisë nga polici Hajredin Boja, i cili mbeti i asfiksuar. Familjarët e 26-vjeçarit kanë deklaruar se ai vuante nga probleme të shëndetit mendor. Nga zjarri në Komisariat u plagos efektivi Hajredin Boja e i arrestuari Dilaver Idrizi, të cilët ndodhen në spital jashtë rrezikut për jetën. Në momentin që i riu i vendosi flakën qelisë, dy policët ishin duke ndjekur ndeshjen e kombëtares, dhe reaguan me vonesë. Fillimisht tentuan ti shuanin vetë, duke nënvlerësuar situatën, por pas përhapjes së flakëve njoftuan forcat e zjarrfikëses, dhe këto të fundit bënë të mundur shuarjen e zjarrit, por nuk u shpëtua dot jeta e 26 vjeçarit Arben Mici.
