Një sipërfaqe e madhe pyjore në zonën e Pratit, sipër fshatit Çidhën në njësinë Administrative Arras, është përfshirë nga flakë.
Mësohet se vatra e zjarrit ka nisur nga dita e djeshme ku është favorizuar nga thatësira dhe era, duke shkrumbuar një sipërfaqe të konsiderueshme.
Deri në këto momente nuk ka pasur ndërhyrje nga strukturat e Drejtorisë së Shërbimit Pyjor. Zjarri i cili vazhdon ende, rrezikon pyjet në Parkun Kombëtar të Lurës.
Kujtojmë se, sipërfaqe me ullishta e pisha kanë marrë flakë ditët e fundit në disa qytetet të vendit. Para pak ditësh janë djegur qindra rrënjë ullinjsh në zonën e fshatit Panaja dhe Bestrovë. Rastet e djegies së ullishteve në Panaja dyshohet se janë pasojë e konfliktet të vjetra midis pronarëve të tokave dhe blegtorëve, pasi këta të fundit djegin tokat, madje dhe ullinj për të përfituar kullota për bagëtitë e tyre.
Vetëm në një javë, në zona të ndryshme të Elbasanit janë identifikuar 5 vatra zjarri. Zjarret në Elbasan janë shfaqur në zona të thella malore.
