Nga zhdukja e fëmijës 4-vjeçar Klodian Ashini, në zonën e Shkozës ende nuk ka asnjë gjurmë të tij edhe pas 24 orëve. Familjarët e të miturit shprehen se për herë të fundit është parë në rrugën kryesore pranë banesave sociale. Policia ka shpërndarë foton e të miturit në gjithë pikat kufitare në rast se djali është rrëmbyer me qëllim trafikimin.
Pak momente pasi kanë konstatuar mungesën e djalit, familjarët janë vënë në alarm për të kërkuar 4-vjeçarin dhe deklarojnë se fëmija ka qenë duke luajtur tek sheshi i banesave sociale, së bashku me një bashkëmoshatar tjetër.
Efektivët e komisariatit nr.1 kanë nisur hetimet për gjetjen e 4-vjeçarit të mitur, duke qenë se kanë kaluar 24 orë nga zhdukja e fëmijës.
Grupi hetimor ka sekuestruar kamerat e sigurisë së disa bizneseve në zonën përreth banesave sociale, të cilat po analizohen për të zbuluar lëvizjet e fundit para momentit të zhdukjes së 4-vjeçarit.
Burime nga policia bëjnë me dije se po hetohet ndonjë konflikt i mundshëm i familjarëve, si shkak për zhdukjen e djalit 4-vjeçar.
