Ministri i Financave, Arben Ahmetaj i ka bërë thirrje Partisë Demokratike të mos ushtrojë presion mbi qytetarët e Kavajës që këta të fundit të ushtrojnë të drejtën e votës së lirë për të zgjedhur kreun e Bashkisë në 7 maj.
Këtë deklaratë Ahmetaj e bëri gjatë inspektimit të punimeve të një shkolle në qytetin e Kavajës ku dhe tha se kjo do të jetë shkolla model e qytetit.
“E gjej rastin t’i bëj një thirrje “çadrës” që ta lerë rehat qytetin e Kavajës, t’i lerë rehat banorët e Kavajës që në 7 maj, të vijnë të ushtrojnë të drejtën e tyre kushtetuese për të votuar, në qetësi të plotë, në qytetari të plotë dhe të zgjedhin kryetarin e ri të bashkisë në mënyrë që projekti i rilindjes urbane të vazhdojë ashtu siç ka vazhduar këto vite, që e ka kthyer Kavajën nga një qytet i harruar, në një qendër urbane dhe në një qendër turistike”, tha Ahmetaj.
Gjatë vizitës për inspektimin e punimeve Ahmetaj shoqërohej nga kandidati për kryetar të Bashkisë Kavajë, Klodian Shehi, i cili ka theksuar rëndësinë e këtij investimi.
Punimet përfshijnë mbi 35 klasa për më shumë se 600 nxënës, laboratorët e fizikës, kimisë dhe informatikës, palestrën dhe fushën e sportit dhe sisteme bashkëkohore të ngrohjes.
