Në një intervistë për emisionin Opinion, Ish-kryeministri Sali Berisha ka folur për lëvizjen e Komisionit të Rithemelimit dhe pjesëmarrjen në zgjedhjet e pjesshme vendore.
Berisha u shpreh se në zgjedhjet e 6 marsit do të aplikohet standardi i primareve që është miratuar në statutin e PD, ndërsa shton se ditën e diel do të nisë faza e zgjedhjes së kandidatëve në të gjashta bashkitë.
“Ky është një revolucion i pandalshëm. Është i pandalshëm pjesëmarrja në zgjedhje. Po aplikojmë standardin e primare që është mishëruar në statutin e PD. Ditën e diel do jenë në të gjitha bashkitë. Nëse do ishte datë e zakonshme ti këtë e filloje katër muaj para. Tani kemi 45 ditë kohë dhe të diel kemi përcaktuar primaret. Kandidaturat po paraqiten.
Ata e dinë që nuk kanë kohë dhe askush nuk i detyron të kandidojnë. Kemi plot kandidatura. Të diel do kemi garë. Votimi është të diel. Votimi nga anëtarësia është më mirë se emërimi nga Kryesia. Zgjedhësit e PD pajisen me një kartë dhe ai merr kartën e zgjedhësit të PD. Në Shkodër janë rreth 20 persona. Lista konkludohet nesër” – tha Berisha.
