Kreu i LSI, Petrit Vasili ka nënshkruar një marrëveshje politike me kreun e PDS, Paskal Milo.
Vasili u shpreh se bashkëpunimi me PSD-në është një moment i rëndësishëm dhe domethënës, ndërsa thekson se LSI-ja ka një vizion bashkëpunimi që shtrihet përtej zgjedhjeve.
“Kemi nënshkruar një marrëveshje bashkëpunimi me PDS e drejtuar nga prof. Paskal Milo dhe është një moment politik domethënës dhe sinjifikativ.
Ne ndërtuam një bashkëpunim politik që ka PDS për raportin e saj me zgjedhjet e lira të ndershme, orientimi për realizimin e objektivave që vendi ka dhe nga më të rëndësishmet, pjesëmarrja në procesin zgjedhor dhe administrimin korrekt të tij, ku LSI ka një vizion bashkëpunimi që shtrihet edhe përtej zgjedhjeve. Bazuar mbi këtë kohezion të gjatë politik që ne kemi, do të kemi edhe administrimin e zgjedhjeve dhe PDS do të ketë si garant, LSI-në.
Është shumë pozitive që ne ecim në hollinë e një bashkëpunimi politik ku shoqëria shqiptare ka nevojë për këto dimensione.”– u shpreh kryetari i LSI-së.
Ndërkohë Milo u shpreh se kjo është një marrëveshje vlerash, e cila do funksionojë si koalicion mes LSI-së dhe PDS-së.
“Marrëveshja që sapo u shkrua me kryetarin e LSI-së është një marrëveshje e natyrshme që ndajnë vlera të përbashkëta. Një marrëveshje që institucionalizon një bashkëpunim.
Nuk drejtohet kundër asnjë partie të tretë por niset nga interesat e të gjithë shqiptarëve. Partia Demokracia Sociale dhe Lëvizja Socialiste për Integrim e bëjnë marrëveshjen me synimin e vetëm për të patur një rezultat maksimal mes partive tona që të investohet pas fushatës. Është një bashkëpunim i mbështetur në vlera. S’më mbetet gjë tjetër veçse ta çoj këtë mesazh nëpërmjet mikrofonit, si një garanci për zgjedhje të lira, dhe garanci se do ketë mbështetje të plotë në fushatën elektorale dhe bashkëqeverisjen e ardhshme të vendit.
Është marrëveshje e dobishme jo vetëm për dy partitë tona por për vlerat e përbashkëta që ndajnë dy parti. Ndonëse nuk na lejohet të kemi një koalicion, për shkak të Kodit Zgjedhor, kjo marrëveshje do funksionojë si një koalicion mes nesh. Ky është një model që politika shqiptare duhet ta bëjë pjesë në vijim”, u shpreh Milo.
Ditën e djeshme disa parti të vogla të majta deklraruan se tërhiqen nga regjistrimi për garën e 25 qershorit dhe se do të kërkojnë vota për PS-në.
Ndërsa kreu i PDS-së, Paskal Milo e refuzoi një veprim të tillë.
