Nga Joni Aliu
Po të na thuhet se ish-strukturat e PDIU-së do ta mbështesin është e tepruar dhe më tregon sa pak e njihni komunitetin, në emër të të cilit prezantoni kandidaten nr. 9 (zgjedhjet paraardhëse kanë arritur deri në 8 (Fate Velaj). Ndoshta po, një pjesë e ish-strukturës që sidoqoftë do të votonte për PS!
Unë jam një nga anëtarët e ish-strukturave të PDIU-së dhe nuk do ju mbështes në këto zgjedhje për disa arsye:
1. Përgjegjësi morale ndaj të afërmve, miqve, shokëve, patriotëve.
Si do i kërkojë votën nanave të rajonit nr. 5 Teuta, kur në zgjedhjet paraardhëse i dhuronte byzylykun e PDIU-së?
2. Mosbesim.
Çfarë ka bërë PS në vitet qeverisëse për çështjen e këtij komuniteti të nderuar si thoni ju në kohë fushate? Në zgjedhjet paraardhëse u futëm bashkë dhe dolëm vetëm! Tani doni votat e çamëve për kandidatin nr. 9!
3. Strategji.
Pse çamët duhet të votojnë kandidatin nr. 9 të PS-së dhe të përmirësojnë situatën e një çami, kur mund të votojnë kandidatin nr. 5 të PD-PDIU duke përmirësuar situatën e shumë pjesëtarëve të këtij komuniteti të nderuar (si thoni ju në kohë fushate), sepse PD ofron bashkëqeverisje?
4. Ideal dhe logjikë.
Jo rastësisht kandidatët e këtij komuniteti të nderuar janë vendosur përkatësisht me numrat 9 (PS) dhe 5 (PD). Në zgjedhjet e 2017-ës PS ka nxjerrë 8 deputetë dhe PD 3 deputetë. PDIU me 3608 vota nuk arriti të nxjerrë asnjë deputet se çamët votuan PS dhe PD.
Sot, endemi në listat e PS dhe PD. Si thoshte Jovan Bregu: “Po kaq budallenj ne të sojit tonë?”.
5. Bashkimi i shqiptarëve të Epirit në një parti (sot kemi PDIU-në) është zgjidhja e vetme për riforcimin dhe përfaqësinë dinjitoze dhe me peshë të këtij komuniteti të nderuar në Kuvendin e Shqipërisë. Ndryshe do endemi pa shpresë majtas e djathtas.
