Deputeti i Partisë Demokratike, Luçiano Boçi ka folur çështjen e Presidentit të ri të vendit. Boçi thekson së asnjë vendim nuk merret pa u pyetur më parë grupi parlamentar i PD. Në një postim në Facebook, Boçi tha se çdo vendimmarrje duhet të jetë kolegjiale dhe se ajo i nështrohet diskutimit në Kryesinë e Grupit parlamentar.
“Çështja e zgjedhjes së Presidentit është një çështje thelbësore e shtetit dhe e marrëdhënieve politike midis maxhorancës e opozitës. Rama mund ta zgjedhë e ta uzurpojë me votat e tij insititucionin e fundit të pa rënë në duart e tij, por ai s’mund të ketë mbështetjen e opozitës as dhe t’i shmanget kundërshtisë politike në opinion nga opozita, nëpërmjet gjoja “agjendave parlamentare”. Askush nuk ka të drejtë të parapërcaktojë individualisht, pavarësisht pozicionit, mënyrat dhe rrugët e reagimit të Partisë Demokratike. Çdo vendimmarrje duhet të jetë kolegjiale. Së pari ajo i nënshtrohet diskutimit në Kryesinë e Grupit parlamentar. Çdo qëndrim apo deklaratë jashtë kësaj vendimmarrje, është krejtësisht individuale dhe si e tillë e pa vlerë” – shkruan Boçi.
Zgjedhjet presidenciale në vendin tonë kanë sjellë një betejë tjetër mes grupimeve opozitare, ku gjatë një dalje publike një natë më parë, Berisha i shqetësuar tha se “Lulzim Basha ka thënë se do të jetë kandidat për president”. Edhe nëse nuk është Basha, si kandidat, emri i ardhshëm i presidentit mund të kalojë përmes votave të grupit të tij.
