“Nëse opozita nuk do të jetë pjesë e raundit të tretë për zgjedhjen e Presidentit, ky raund do të digjet pa asnjë kandidat nga ana jonë”- shprehet kryetari i Grupit Parlamentar socialist, Gramoz Ruçi.
Në mbledhjen e përjavshme të Grupit Parlamentar socialist, Ruçi ka informuar deputetët e tij për procedurën që po vijon në Parlament për kreun e ri të shtetit.
“Jemi në pritje të opozitës që të bëhet pjesë e procesit të zgjedhjes së Presidentit të Republikës. Kjo do të varet nga negociatat që do të bëhen me përfaqësuesit e Partive Popullore Europiane dhe komisionerin për Zgjerim, që vijnë nga Brukseli. Nëse nuk do të jetë pjesë e këtij procesi edhe opozita, ky raund do të digjet pa asnjë kandidat nga ana jonë”, është shprehur Ruçi.
Dy bashkëkryetarët e koalicionit qeverisës, Rama e Meta, kanë vendosur që zgjedhjen e Presidentit të ri të Republikës ta bëjnë pjesë të axhendës së negociatave me opozitën për t’i dhënë asaj mundësi që të heqë dorë nga bojkoti i Kuvendit dhe votimi i komisioneve të vetingut.
