Ish-deputeti Eduard Halimi e ka etiketuar procesin e zgjedhjes së presidentit të republikës një farsë që e dëmton figurën e presidentit të ardhshëm. Në intervistën për A2cnn, ai tha se opozita duhet t´u thotë të vërtetën shqiptarëve, që sipas tij Rama do ta zgjedhë vetë, në mënyrë që të rrisë besimin te qytetarët.
“90% të kabinetit Rama e ka jashtë grupit parlamentar, të tjerë bëjnë fushatë të tjerë marrin vota dhe të tjerë poste në qeveri.
Procesi është fasadë dhe dëmton figurën e presidentit të ardhshëm, e banalizon. Ky proces duhet të ketë një lloj solemniteti edhe në Itali nuk ka ndonjë kompetencë është ceremonial, por ka proces dinjitoz në të cilën zhvillohet. Ky proces të gjithë e dinë që është fars. Politika është arti i kompromisit.
Opozita duhet t’u thotë qytetarëve shqiptarë realitetin që Rama do ta zgjedhë vetë. Besimi rritet duke u thënë të vërtetën”, thotë Halimi.
Ai gjithashtu thekson se projekti kushtetues ishte shpresëdhënës që drejtësia do të ishte më e pavarur, por ligjet e miratuara më pas deformuan konceptin kushtetues dhe shkuan drejt kapjes së sistemit të drejtësisë.
Sipas Halimit, zgjatja e organeve të Vettingut dhe mungesa e institucioneve të drejtësisë kanë sjellë kapjen e drejtësisë, gjë e cila u paralajmërua edhe nga Komisioni i Venecias, i cili nuk ia sugjeron askujt modelin shqiptar të kësaj reforme.
“Projekti kushtetues ishte shpresëdhënës që drejtësia do të ishte më e pavarur, se nuk kishim ndikimin e ministrit, presidentit, kryeministrit. Përzgjedhja do të kalonte përmes balancimeve të pushtetit. Ligjet e miratuara më pas deformuan konceptin kushtetues dhe shkuan drejt kapjes së sistemit të drejtësisë. Zgjatja e jashtëzakonshme e Vettingut do të sillte ndikim të qeverisë në një proces selektiv. Ky proces po zgjati do të çonte në kapjen politike të atij që do të kishte pushtetin. Venecia paralajmëroi që po pati vonesa do të kapet drejtësia. Mungesa e gjatë e institucioneve të drejtësisë e bënte qeverinë komode”, theksoi Halimi.
Dhe për ta vërtetuar qëndrimin e tij, ish-deputeti demokrat thekson se mjafton të shihet SPAK i cili është nën kontrollin e plotë të qeverisë. Ai sjell shembullin e Rumanisë ku funksionin sistemi ligjor dhe frika nga ligji.
“Doni të shihni si është situata në drejtësi, shikoni SPAK, shikoni patronazhistët. Cili ishte qëndrimi gjatë zgjedhjeve? Isha në Rumani në 2018 për të nënshkruar një kontratë për energjinë, kolegët e mi rumunë refuzonin që të bëheshin pjesë dhe të nënshkruanin si avokatë. Nuk pranonin, këtu drejtësia funksionon në këtë mënyrë. Që nëse ka dyshime për korrupsion verifikohen në bllok dhe arrestohen. Ishte krijuar klima se funksionon sistemi ligjor. Frika nga ligji. Pavarësia dhe jetëgjatësia në detyrë, ndërsa prokurorët e SPAK në Shqipëri janë me mandat. SPAK-u është nën kontrollin e qeverisë”, shtoi ai.
Për të treguar kapjen e drejtësisë, Halimi sjell në vëmendje edhe dosjet në Gjykatën e Lartë ku vetëm 5 prej tyre gjykohen në prani të palëve dhe nga këto 4 i fiton shteti dhe një individi. Por Halimi thekson se edhe ato që gjykohen në dhomë këshillimi 85% fitohen nga shteti.
“Janë 35 mijë dosje në Gjykatën e Lartë. Marrim shembullin e kolegjit Administrativ në gjykatën e lartë. Vetëm në 100 ditë të viti 2022 janë 275 çështje, vetëm 5 prej tyre janë gjykuar në prani të palëve, 270 të tjerat në dhomë këshillimi dhe vendosin vetë. Pra 2% në prani të palëve dhe nga 5 çështje një e ka fituar individi 4 shteti. Nga këto në dhomë këshillimi 85% i fiton shteti dhe 15% biznesi”, shtoi ai.
