Pas vendimit të Komisionerit Publik për të apeluar vendimin e KPK-së për kalimin e Vetingut, kreu i Gjykatës së Lartë, Xhezair Zaganjori ka qenë sot në Komisionin e Pavarur të Apelimit.
Në një deklaratë për mediat, Zaganjori tha se ai është treguar bashkëpunues, dhe ka bërë të pamundurën për të gjetur dokumentet e kërkuara nga ana e KPK-së.
“Sot paraqita dhe 10 dokumente të tjera, bëra më të mirën time, kam paguar çdo detyrim tatimor ndaj shtetit”, tha kreu i Gjykatës së Lartë, i cili u pyet më pas dhe për përzgjedhjen e anëtarëve të rinj të isntitucionit që ai drejton. Zaganjori u shpreh se përzgjedhja e anëtarëve jo gjyqtarë të Gjykatës së Lartë, do ti jepte frymëmarrje pjesërisht shumë çështjeve që presin për tu marrë në shqyrtim.
Ndërkohë që i pyetur për Reformën në Drejtësi në kompleks, dhe për dokumente që i kërkohen nga vitet ’60, kreu i Gjykatës së Lartë tha se disa herë kalohen edhe caqet në dokumentet që kërkohen, po ai sërish do të përpiqej të ishte bashkëpunues deri në fund me trupën gjykuese.
“Unë përpiqem që të bëj më të mirën, ndonjëherë kalohen edhe caqet, sa do të merren parasysh kjo varet nga trupa gjyqësore”, u shpreh më tej Zaganjori.
