Kryeministri i ri i Maqedonisë së Veriut, Zoran Zaev mori sot zyrtarisht mandatin e dytë nga Kryeministri i deritanishëm teknik Oliver Spasovski.
Në fjalën e tij, Zaev ka falënderuar Kryeministrin e deritanishëm Oliver Spasovskin dhe anëtarët e Qeverisë kalimtare për punën e suksesshme gjatë nëntë muajve të fundit, ku theksoi se kjo qeveri me guxim dhe me sukses u ballafaqua me krizën shëndetësore-ekonomike shkaktuar nga virusi korona.
Kryeministri Zaev i uroi Spasovski bashkëpunim të frytshëm dhe vazhdimësi në tejkalimin e sfidave në atë resor, si dhe pjesëmarrje aktive në punën e Qeverisë në sjelljen e politikave në interes të të gjithë qytetarëve të Republikës së Maqedonisë së Veriut.
“Në kushte të tilla të komplikuara, me sukses u organizuan dhe u zbatuan zgjedhje të drejta dhe demokratike dhe u zgjodh Qeveria e re.Tani Republika e Maqedonisë së Veriut është anëtare e NATO Aleancës dhe e realizon perspektivën e vendosur të BE-së pas marrjes së vendimit për fillim të negociatave me Bashkimin Evropian”, ka thënë Zaev.
