Lideri i LSDM-së, Zoran Zaev ka deklaruar se Gjorgje Ivanov ka shkaktuar një krizë kushtetuese duke kundërshtuar vullnetin e popullit, nënshkrimet e 67 deputetëve, dhe duke u vënë në shërbim të Nikolla Gruevskit dhe VMRO-DPMNE-së.
Në një konferencë për shtyp Zaev tha se Ivanov me vendimin që të mos e jep mandatin, ka bërë grusht-shtet, duke e futur vendin në një krizë të thellë.
Zaev theksoi se Gruevski po fundoset, duke shtuar se nuk do ta lejojmë ta marrë edhe Maqedoninë me vete.
Zaev ftoi Ivanovin ta tërheq këtë vendim pasi nuk ka të drejtë ta mohojë të drejtën e qytetarëve të shndërruar në 67 nënshkrime deputetësh.
