Ish-Kryeministri Sali Berisha u shpreh se ka marrë fund loja me opozitën kukull në Shqipëri. I ftuar në emisionin “Të Paekspozuarit”, Berisha iu përgjigj deklaratës së ambasadores Yuri Kim, e cila mori në mbrojtje Enkelejd Alibeajn. Ai tha se ajo që mund t’i thotë diplomates është vetëm ajo që loja me opozitë kukull ka marrë fund dhe kjo është arritja më e madhe e Shqipërisë. Në vijim, Berisha tha se doli në foltoren e Kuvendit për tiu përgjigjur Edi Ramës.
“Pozicion qesharak i guvernatores, e cila merr përsipër të interpretojë rregulloren e parlamentit. Merr përsipër të përcaktojë se kush duhet të merrte fjalën dhe të protestojë se akuzohet qeveria dhe se nuk duhen bërë akuza. Natyrisht ajo që mund ti them zonjës është, merr fund loja me opozitë kukull. Nuk ka më opozitë kukull. Unë po i përgjigjesha Edi Ramës, që ishte zbehur. Ka mundësi t’ju jetë dhimbsur njerëzve” – tha Berisha.
Berisha komentoi edhe ngjarjen në Parlament, duke deklaruar se u përpoq të merrte fjalën dhe se Alibeaj shërbeu “si vegël e Ramës” për ta penguar, ngjarje të cilën e cilësoi të përsëritur.
“Ai nuk është një problem midis meje dhe Alibeajt. Është një problem midis meje dhe Edi Ramës. Edi Rama foli sa deshi dhe lakoi emrin tim 30-40 herë. Në ligjin e parlamentit, në qoftë se deputeti gjatë diskutimit, përflet një deputet tjetër, fill pas tij i jepet fjala dy minuta. Çfarë mekanizmi kanë krijuar? Të turpshëm, të një keqpërdorimi ekstrem të Enkelejd Alibeajt. Para një muaji ndodhi e njëjta skenë. Ngrihet Taulant Balla nga vendi dhe i thotë Lindita Nikollës, nuk do ti japësh fjalën Berishës por Enkelejdit” – tha Berisha.
Ai sqaroi edhe një herë “përplasjen” e ndodhur dhe tha se Alibeaj po përdoret nga qeveria.
“Ajo ishte një komandë shumë e turpshme, nuk e kisha parë në 30 vite. Sot e njëjta skenë. Foli Rama sa foli. Deklaroi çdo gjë kundër meje. Kisha shtypur butonin për reagimin. Isha përgojuar nga Rama disa herë. Unë u ngrita të merrja fjalën. E nxorën atë me vrap në platformë. Ishte akt aq i shpëlarë. Kërcen Taulant Balla, kur unë do të merrja fjalën. Proteston dhe kërkon 5 minuta pushim, vetëm të mos lejohesha unë të përgjigjesha. U detyrova të dal tek mediat jashtë. Kemi të bëjmë me njeri që keqpërdoret në mënyrë mjerane. Të bëhesh vegël për t’i mohuar të drejtën e fjalës një deputeti” – tha Berisha.
