Nga Ibrahimoviç tek Leo Mesi, ja kapitenët që nuk i nxorrën kurrë në breg anijet e tyre
Ka sportistë të mëdhenj që janë tërhequr nga kariera e tyre kur kanë arritur një sukses të madh dhe kjo është diçka që mbetet në kujtesë. Por ka edhe të tjerë që po e bëjnë një gjë të tillë pas zhgënjimesh të njëpasnjëshme. Zlatan Ibrahimoviç, i cili po punon për të realizuar një kontratë faraonike me Mançesterin e Murinjos (flitet për një pagë 1 milionë euro në muaj) u largua nga Kombëtarja e tij duke mos lënë shumë gjurmë. Suedia u eleminua që në fazën e grupeve të Euro 2016, ndërsa Ibra jo vetëm që nuk shënoi, por dukej i bezdisur në fushë. Leo Mesi, por edhe Darijo Sërna i Kroacisë kanë marrë një vendim të ngjashëm. Superfutbollisti i Barcelonës humbi një tjetër finale me uniformën e Argjentinës, me të cilën nuk ka fituar asgjë. “Kam dhënë maksimumin për të fituar diçka, por nuk munda… tani tërhiqem”, janë fjalët e fundit mes lotëve të “pleshtit”, pas finales së kupës së Amerikës ndaj Kilit, ku humbi edhe një 11 metërsh që mund të vendoste shumë. Veç të tjerave, largimi i Mesit mund të sjellë një efekt domino tek “Selesion”, pasi pritet që një gjë të tillë ta bëjë edhe Sexhio Aguero, Havier Maskerano dhe Gonazalo Higuain. Ndërkohë që edhe arsyeja e Sërnës ishte eleminimi i Kroacisë nga Portugalia, ndërkohë që kroatët ishin bindur që kishin skuadrën më të mkirë të finaleve dhe meritonin trofeun. Por ka edhe lamtumira për arsye shumë objektive, siç është rasti i “legjendës” hungareze, portjerit Gabor Kirali, i cili në këtë europian ishte plot 40 vjeç. Edhe italianët mund të mos kenë më shërbimet e Barzalit, por të gjithë urojnë që ky vendim të merret në Paris, vetëm pas finales së 10 korrikut.
