Nga Mira Kazhani
Tirana nuk u përmbyt këtë radhë dhe ky ishte problem për disa, sidomos për ata që kanë axhenda politike. Pamja e Erjon Veliajt, i lagur në shi dhe fakti që investimet e bëra për Tiranën e kaluan një sprovë të parë sollën edhe një herë në vëmendje sesa e pa menaxhuar ka qenë Tirana e Lulzim Bashës.
Në hallin që Tirana nuk e tradhtoi kryetarin e saj, por edhe të pamundshmërisë që fakti i vuri para së vërtetës edhe kritikët e kryetarit të Bashkisë së Tiranës. Duke ia pranuar suksesin këtë herë, punën, u gjet gjithsesi për lalin një shteg. Diversioni! Përpjekja për të sharë Edi Ramën, jo nga Kina por nga Bashkia duket simpatike! Edi Rama, mund të sulmohet pa shumë mund, mjaft të kesh dëshirë. Por krahasimi mes Veliajt energjik dhe Ramës së lodhur, Veliajt të papërmbytur dhe Ramës të përmbytur e në mërzi, është ashiqare dëshirë për të krijuar një konflikt të ri. Për ta mbuluar dështimin e vërtetë, dështakët e vërtetë me një tjetër fabul politike.
Një sherr mes Edi Ramës dhe Erjon Veliajt, është ëndrra e vjetër. Kjo edhe mund të ndodhë, se kush e parashikon politikën. Kush e mendonte në vitin 2000 se Sali Berisha do vinte në 2005 më pushtet pas vitit ’97. Apo se Ilir Meta do qeveriste me doktorin, që pastaj do takohej në Lalz me Edin dhe do hapnin një kapitull të rimiqësisë në Rilindje! Politika e tillë është! Edhe tezat që hidhen në media janë një lojë profesionistësh të gjithanshëm dhe sidomos në sherre. Vetëm se këtë herë Tirana thjesht nuk u përmbyt! Që të rrimë shtrembër e të flasim drejt, lali Eri ia hodhi, nuk na e hodhi! A thua të jetë xheloz për këtë Kryeministri? Këto përgjigje i dinë profesionistët me siguri!
