Ministri i Brendshëm, Fatmir Xhafaj priti sot ministrin e Shtetit për Sigurinë në Britaninë e Madhe, Ben Wallace.
Takimi u mbajt në zyrën e ministrit të Brendshëm, ku në fokus të diskutimeve ishin çështjet që prekin sigurinë në të dy vendet.
Xhafaj i parashtroi Wallace prioritetet e detyrës së tij, duke u ndalur tek lufta kundër kultivimit dhe trafikimit të kanabisit, krimit të organizuar e grupeve kriminale, si dhe në promovimin e integritetit të punonjësit të shtetit përmes shtrirjes së procesit të Vetting-ut edhe në radhët e Policisë së Shtetit.
Ministri Wallace e konsideroi bashkëpunimin dhe partneritetin me palën shqiptare, ndër më të suksesshmet. Palët u dakordësuan për ardhjen në Shqipëri të 3 oficerëve të policisë britanike në mënyrë të përhershme, për të rritur shkëmbimin dhe cilësinë e informacionit, të kapaciteteve inovative që ka në përdorim policia, si edhe trajnime për punonjësit e Policisë së Shtetit.
