Ish-Kreu i Lëvizjes Vetëvendosje në Shqipëri, Boiken Abazi, është shprehur pro protestës që do të mbahet në Shqipëri kundër presidentit Aleksandër Vuçiq.
Përmes një shkrimi në Facebook, ai thotë se do të marrë pjesë në protestë kundër “Open Balkan”, por shprehet se është i vetëdijshëm për skenarin apo qëllimet e ndryshme që mund të ketë Sali Berisha.
Sipas Abazit, Berisha ka ndërruar disa herë mendje për “Open Balkan”, ndërsa shton se motivet e tij “nuk janë të pastra”.
Postimi i plotë
Pa ndjekur skenarin e qëllimet e Sali Berishës që ka planifikuar ta nisë protestën e sotme te Selia e PD-së, duke e ditur që ai ka ndërruar mendje disa herë lidhur me “Open Balkan” dhe se motivet e tij për këtë protestë nuk janë të pastra, në pamundësi për ta organizuar vetë sot një protestë kundër vizitës në Shqipëri të kriminelit të luftës të papenduar Aleksandar Vuçiç, në mungesë të thirrjeve të tjera për të protestuar kundër politikave dhe vizitës së Vuçiçit, në kundërshtim të insistimit të Edi Ramës për të ecur para me këtë projekt, sot do shkoj në protestë para kryeministrisë kundër projektit të Novi Sadit për botën serbe, të ashtuquajtur “Open Balkan”.
