21-vjeçari nga Kukësi, Mirald Metallari, i cili vrau të atin polic me armën e shërbimit dhe plagosi nënën në Bathore është rrëfyer mes lotësh mbi atë që ka ndodhur.
Herë pas here, Metallari ka pyetur efektivët mbi gjendjen e nënës së tij, që u plagos aksidentalisht në tëntativën për të ndarë të birin dhe bashkëshortin.
“Nuk doja të ndodhte kështu. As vetë nuk e di si e kam shkrepur armën. Nuk doja të vrisja njeri, por isha shumë i tronditur”, është shprehur i riu para efektivëve.
Ai ka treguar se debati me të atin ka ndodhur për një mur në oborrin e tyre. Ai thotë se i ati i ka kërkuar llogari për punën që nuk ishte bërë si duhet.
Familja nga Kukësi po kryente punime në shtëpi pasi në gusht do të martonin vajzën.
“Po përgatiteshim për dasmën e motrës në gusht. Unë shkatërrova gjithçka”, është shprehur ai.
Metallari e ka lidhur veprimin e tij me gjendjen e rënduar psikologjike pas kthimit nga Anglia.
Ai ka treguar se ka punuar dy vite në Angli pa dokumente dhe pas kthimit në Shqipëri nuk ka qenë në gjendje aspak të mirë.
