Një ngjarje e rëndë ka ndodhur në mëngjesin e sotëm në qytetin e Gjilanit. Mësohet se një efektiv i policisë së Kosovës me inicialet V.H ka goditur për vdekje një person në mes të rrugës “Nato 99”.
Sipas Inspektoratit Policor të Kosovës, efektivi ka qenë jashtë detyrës zyrtar kur ka shtënë me armë zjarri në drejtim të viktimës, L.S . Bëhet me dije se ai është arrestuar menjëherë, ndërsa i është dhënë masa e ndalimit për 48 orë, si dhe pushimi nga puna.
Ndërkohë autoritetet kosovare po punojnë për të zbardhur këtë ngjarje. Trupi i pajetë i viktimës është dërguar në Institutin e Mjekësisë Ligjore në Prishtinë.
“Personi i dyshuar në këtë rast – zyrtari policor, është arrestuar nga Inspektorati Policor kurse me vendim të prokurorit të njëjtit i është caktuar masa e ndalimit për 48 orë dhe është suspenduar nga detyra.Veprimet e mëtutjeshme hetimore lidhur me këtë incident do të vazhdojnë nga hetuesit e IPK-së në konsultim të vazhdueshëm me prokurorin përgjegjës”, thuhet në njoftim.
