Një ditë pas arrestimit të tre të rinjve, të dyshuar si bashkautorë në vrasjen e Jurgen Kurtit dhe shpalljen në kërkim të autorit të 4 të dyshuar me inicialet K. B, dalin detaje të reja për lëvizjet e këtij të fundit dhe si arriti policia ta identifikonte.
Policia bën me dije se ditën e ngjarjes mjetit tip “Benz” ngjyrë gri me të cilën iu bë atentat Jurgen Kurtit, K.B i ka mbivendosur targa false.
Pas ngjarjes mjeti është ndjekur nga kamerat e sigurisë dhe është kapur duke u futur në një rrugicë ku ka hequr targat false për të vijuar të qarkullojë me targat e veta. Ishte pikërisht ky detaj që ndihmoi policinë të identifikojë pronarin dhe me pas 3 miqtë e tij tashmë të arrestuar: Elsi Levendi lindur në Athinë/Greqi dhe banues në Tiranë, Olsi Qalliaj 22 vjeç, lindur në Fier dhe banues në Patos dhe Alesio Berberi 33 vjeç lindur në Patos dhe baunes në Patos, Fier.
Në drejtim të mjetit ka qenë i shpalluri në kërkim, ndërsa pranë banesës së Kurtit dhe personi që e ndiqte në këmbë ka qenë 21-vjeçari, Elsi Leventi. Edhe momentin e vrasjes, 21-vjeçari ka qenë i pranishëm në zonë dhe dyshohet se ai ka njoftuar ekzekutorët për mbërritjen e Kurtit pranë pallatit.
Nga pamjet e kamerave të sigurisë në zonë, policia ka ndjekur lëvizjet e 21-vjeçarit dhe është parë se pas atentatit ata janë takuar. Pas identifikimit të personave, ata janë vënë në përgjim dhe janë arrestuar.
Arma, makina dhe sendet e tjera të sekuestruara nga policia janë gjetur në banesën e Alesio Berberit. Të 3 të arrestuarit kanë mbajtur qëndrim mohues para policisë se nuk janë ata personat që vranë Jurgen Kurtin.
