Zbulimi i një pistolete disa dhjetra metra larg vendit ku efektivi i “Shqiponjave” Nevaldo Hajdaraj vrau 25-vjeçarin Klodian Rasha, përfshirë edhe autorët e “zbulimit” dhe kohën e saj, ngrenë dyshimet se e gjitha mund të jetë një “alibi” mbrojtëse e kolegëve të policit-vrasës për të justifikuar veprimet e tij.
“Boldneës.al” po analizon në mënyrë të thjeshtuar të gjithë elementët e publikuar deri më tani, si edhe ato që gjenden në dosjen hetimore, për të hedhur sadopak dritë mbi “misterin” e pistoletës së gjetur në një pellg me ujë.
Raportimet e para policore për vrasjen e 25-vjeçari Klodian Rasha nga efektivi i “Shqiponjave”, Nevaldo Hajdaraj, u shoqëruan me një element “dytësor”, atë të zbulimit të një pistolete, diku pranë vendit të ngjarjes.
Ky “detaj” i servirur fuqishëm nga Policia përputhej me deklarimet paraprake të autorit të vrasjes, policit Hajdaraj, i cili deklaroi para kolegëve të tij se ai kishte qëlluar me plumba ndaj viktimës Rasha, pasi ndihej i rrezikuar, për shkak se kishte pikasur se mbante në dorë një send të dyshimtë, të ngjashëm me pistoletë.
Pas këtyre raportimeve të para, zhvillimet e mëtejshme dhe sidomos detajet hetimore, hodhën më shumë hije misteri mbi “pronësinë” e pistoletës, e cila u gjend në vendngjarje.
Dyshimet
Në raportin e ngjarjes thuhet se, në një kontroll të kryer pas ngjarjes, natën duke u gdhirë 8 Dhjetori, shërbimet policore “Shqiponja” gjetën një pistoletë, tip “Zoraki”, me ngjyrë të zezë, në një pellg me ujë, pranë ish-Drejtorisë së Përgjithshme të Doganave, shumë metra larg vendit të vrasjes së Klodian Rashës.
Nga këto të dhëna paraprake, si edhe të tjera në vijim, ngrihen një seri pikëpyetjesh.
“Zbuluesit” e pistoletës
“Zbulimi” i pistoletës “Zoraki” është gjetur nga dy efektivë të “Shqiponjave”, pjesë e të njëjtës trupë policore që i përkiste edhe Navaldo Hajdaraj.
Në një vend-ngjarje kriminale, si ajo që ndodhi me Klodian Rashën, veprimet hetimore kryhen nga ana e oficerëve të Policisë Gjyqësore.
Pavarësisht se efektivët blu gëzojnë atributet e Policisë Gjyqësore, në rastin konkret mund të ishin angazhuar anëtarë të strukturave të tjera.
Por, siç rezulton nga të dhënat hetimore, verifikimet në një zonë shumë metra larg vend-ngjarjes, përfshirë edhe “zbulimin” e pistoletës “Zoraki”, janë kryer nga efektivët e “Shqiponjave”, nën urdhërin e drejtuesit të sektorit të tyre.
Vendi i “zbulimit”
Klodian Rasha u vra në rrugicën e shtëpisë së tij, pranë një servisi automjetesh, rreth orës 1.10 minuta, duke u gdhirë mëngjesi i datës 8 Dhjetor 2020.
Disa orë më vonë, efektivët e “Shqiponjave” zbuluan një pistoletë “Zoraki” në një pellg me ujë, ngjitur me murin e ish-Drejtorisë së Përgjithshme të Doganave.
Dy vendngjarjet, pra vendi i vrasjes dhe vendi i gjetjes së pistoletës, janë në një distancë rreth 100 metra larg njëra-tjetrës. Pra, edhe pse Policia u mundua të kanalizojë, në mënyrë indirekte, “pronësinë” e pistoletës “Zoraki” tek Klodian Rasha, ky fakt gjithësesi nuk e ndihmon alibinë e Nevaldo Hajdaraj për të justifikuar vrasjen.
Nga të gjitha faktet e deritanishme, rezulton se Klodian Rasha, të paktën në momentin e vrasjes, nuk ka pasur pistoletë në dorë.
Por, ai mund të mos ketë patur fare pistoletë. Këtu ngrihet dyshimi i radhës.
“Pistoleta pa gjurmë gishtash”
Ekspertiza paraprake që i është bërë pistoletës së gjetur rreth 100 metra larg vendit të ngjarjes, ka arritur në konkluzionin se mbi armë nuk u gjetën gjurmë gishtash.
Arsyeja? Arma u gjet në një pellg me ujë dhe për këtë arsye i janë fshirë elementët identifikues të mbajtësit të saj.
Nëse e marrim në invers, pra duke pranuar dyshimet e policisë së ajo armë mund të ketë qenë në dorën e Klodian Rashës, duke e vështirë për t’u besuar se 25-vjeçari, në kohën që ishte në ndjekje nga Nevaldo Hajdaraj dhe kolegu i tij, të ketë menduar jo vetëm të fshehë pistoletën, por edhe të gjej një vend ku të fshihen gjurmët e gishtave (pellg me ujë).
Nëse i ndjeri ka menduar këto gjëra pak momente para vrasjes, ai ose duhet të ketë parë shumë filma policorë, ose policët kanë parë shumë “filma” për të krijuar prova të paqena.
Megjithatë, hetimet e Prokurorisë së Tiranës për ngjarjen janë vetëm në fillim të tyre. Pjesë e veprimeve proceduriale është edhe zbulimi i “pronësisë” së pistoletës “Zoraki”, për të cilën elementë të caktuar nga Policinë e Shtetit shpresojnë t’ia atribuojnë viktimës Klodian Rasha./Boldnews/
