Nga Klodian Tomorri
Këto janë zgjedhjet më të rëndësishme të Francës në 50 vitet e fundit. Rezultati i tyre do të përcaktojë jo vetëm fatin e Francës, por edhe atë të Bashkimit Europian.
Exit poll-et e para tregojnë se gara përfundimtare do të jetë mes Emmanuel Macron dhe Marine Le Penn. Këtu ka dy lajme të këqija dhe një të mirë.
Lajmi i parë i keq është se Presidenti i Francës nuk do të jetë Francois Fillon. Ndër të gjithë kandidatët ai ishte më i miri.
Franca është një shtet që ka dëshpërimisht nevojë për reforma. Sektori publik është rritur deri në çmenduri duke ngrënë 55 për qind të Prodhimit Kombëtar. Kjo është arsyeja kryesore se përse Franca noton në stanjacion prej vitesh.
Platforma ekonomike e Fillon parashikonte shkurtimin me 100 miliardë euro të shpenzimeve publike për 5 vitet e ardhshme, reduktimin e administratës se tejfryrë deri në marrëzi dhe shumë reforma të tjera alla Thatcher. Këto janë gjëra, për të cilat Franca ka tmerrësisht nevojë, por të cilat francezët duket se nuk janë ende gati t’i pranojnë.
Lajmi i dytë i keq është që ajo nazistja me ide të fandaksura është ende në garë. Fitorja e Le Pen do të ishtë një thikë mu në zemër për Europën duke vënë në rrezik shumë gjëra, përfshirë ekzistencën e Bashkimit Europian. Imagjinoni çfarë mund të ndodh nëse fiton një kandidate, e cila thotë se do të nxjerrë Francën nga NATO dhe BE për të bërë aleancë me Rusinë.
Lajmi i mirë është që pretendenti kryesor është Macron. Ky nuk ishte zgjedhja më e mirë, por si kanë ardhur kohët edhe second best nuk është keq. Fitorja e Macron do të garantonte jo vetëm stabilitet politik, por edhe ekonomik për vendin. Por, mbi të gjitha do të shmangte një rrezik shumë të madh për BE-në dhe demokracitë perëndimore.
