Policia e Tiranës ka vënë në pranga dy persona dhe shpalli në kërkim një të tretë me akuzën e vjedhjes së kasafortës në një ndërtesë në Rrugën e Dibrës, në kryeqytet.
Sektori për Krimet e Rënda, në bashkëpunim me Komisariatin nr. 4, në kuadër të operacionit të koduar “Roleks” bënë arrestimin e Eduart Ngotës dhe Zenel Damës, përkatësisht 32 dhe 27 vjeç. Arrestimi i tyre u bë i mundur në bazë të një pune të dokumentuar me prova ligjore se ata janë personat që kryen vjedhjen e kasafortës më datë 15 gusht.
Në cilësinë e provës materiale policia sekuestroi 9 500 euro të holla, tre orë dore, tre byzylykë floriri dhe një varëse floriri, sikurse dhe një veturë tip Fiat që ka shërbyer për transportin e kasafortës së vjedhur.
Ndërkohë që në kërkim u shpall një 36-vjeçare me banim në Tiranë. Materialet i kaluan Prokurorisë së Tiranës për veprime të mëtejshme.
