Policia e Vlorës ka bërë të mundur sekuestrimin e dy mjeteve lundruese, pasi dyshoheshin se do të përdoreshin për trafik droge.
Mjeti i parë lundrues, një skaf plastik, pa emër, me gjatësi 7.5m dhe gjerësi 2.2m, me dy motora të fuqishëm dyshohet se ka ardhur nga Italia dhe se drejtohej nga dy italianë, të cilët porsa kanë parë policinë kanë fshehur mjetin në krah të kalatës së Petroliferës dhe janë larguar. Vijon puna për kapjen e dy shtetasve italianë.
Ndërsa mjeti i dytë është konstatuar gjatë kryerjes së shërbimit nga ana patrullës së policisë kufitare në Triport, në zonën e pyllit te Akërnisë, Hidrovor. Mjeti lundrues tip skaf i gjatë 8 m, ishte hipur në karelë dhe në afërsi të tij u gjend dhe një mjet tip kamionçinë.
Nga të dhënat paraprake rezulton se mjeti lundrues është në pronësi të shtetases L. Xh dhe përdorues mjeti S. Xh. Nga kontrolli i territorit nuk është gjetur ndonjë send i kundraligjshëm. Policia po vijon kontrollin e zonës si dhe po punon për zbardhjen e rrethanave për të dy rastet.
