Një sasi prej një 1 ton e 255 kg kanabis sativa është sekuestuar sot nga policia e Vlorës. Në sajë të operacionit të koduar “Underground” është vënë në pranga Ilirjan Borakaj, 55 vjeç, nga fshati Peshkëpi i Vlorës. Ky shtetas kishte hapur tunele të nëndheshme në shtëpinë e tij për të fshehur lëndën narkotike.
“Lënda narkotike, ishte fshehur poshtë banesës së këtij shtetasi, nëpër tunele të nëndheshme të hapura posaçërisht për fshehjen e saj, të vendosura nëpër paketime të mbështjella me me qese plasmasi dhe natriban ngjitës. Policia dispononte informacion të besueshëm, se kjo sasi me lëndë narkotike do të trafikohej në ditët në vijim nëpërmjet ujërave detare drejt shtetit Italian”, thuhet në njoftimin zyrtar të policisë.
Gjithashtu bëhet më dije se kjo sasi droge e fshehur në tunele është realizuar në bashkëpunim dhe me persona të tjerë dhe policia po punon për identifikimin dhe kapjen e tyre. Një prej personave të dyshuar është dhe vëllai i Ilirjan Borakës, Jetnor Borakaj, 44 vjeç, i cili aktualisht është në kërkim për prodhim dhe shitje narkotikësh që prej vitit 2012, kur është dënuar me dy vite burg.
