Policia e Vlorës ka sekuestruar mbrëmjen e djeshme një sasi prej 900 kilogramë kanabis sativa. Lënda narkotike u sekuestrua në plazhin e Zvërnecit në Vlorë, e cila ishte gati për tu transportuar me gomone në drejtim të Italisë.
Policia e Vlorës bën me dije se ka arrestuar 6 persona, 4 që po tentonin të ngarkonin lëndën narkotike në gomone në vendin e quajtur “Hunda e plakut”, vend në të cilin kishin transportuar pakot me lëndë narkotike nëpërmjet dy automjeteve Benz me targë AA 252 DK dhe Toyota me targë AA 354 MK dhe dy të tjerë që drejtonin mjetin), të cilët u arrestuan pas 8 orë ndjekjesh në pyllin e fshatit Pish Poro.
Të arrestuarit janë shtetasit: Eduart Grabova, 39 vjeç, banues në fshatin Babicë e Madhe, Redjan Hasanaj, 28 vjeç, banues në Vlorë, Napolon Arshiaj, 27 vjeç, banues në fshatin Lepenicë, Ilir Qejvani, 24 vjeç, banues në Vlorë, Jani Bajramaj, 24 vjeç, banues në fshatin Lukovë, dhe Eduart Abazi, 49 vjeç, banues në Vlorë.
Lënda narkotike u gjet rreth 50 m larg bregut të detit, e cila ishte paketuar nëpër pako me peshë 15-30 kg secila, me mbështjellje natribani.
Policia sqaron se: “Mjeti lundrues u largua menjëherë sapo ndjeu ndërhyrjen e forcave të policisë nga toka dhe në tentativë për t’i shpëtuar ndjekjes, u bllokua nga Policia Kufitare dhe GdF pak minuta më vonë në Gjirin e Portonovës, Zvernec. Mjeti lundrues, kishte përmasat prej rreth 6 m gjatësi, 2.4 m gjerësi dhe me 1 motor 75 CC”.
