“Virusi vazhdon të qarkullojë”, Pipero reagon pas numrit rekord të infektimeve: Ishte e pritshme pas hapjes

Mjeku i Infektivit, Pëllumb Pipero tregon që shtimi i rasteve pozitive me koronavirus ishte i pritshëm nga të gjithë specialistët.
Pipero përmes një intervistë të dhënë pranon se me hapjen e plotë të vendit ra vigjilenca e qytetarëve.
Mjeku i shërbimit infektiv thekson se virusi do të jetë në qarkullim, dhe pse situata pritet të përmirësohet pasi agresiviteti i virusit ka rënë
“Në radhë të parë është heqja e të gjitha masave kufizuese 10-15 ditë më përpara, së dyti është hapja e shumë aktiviteteve ekonomike, baret restorantet, një ndikim kanë pasur edhe tubimet dhe protestat e ndryshme. Po ashtu, një arsye tjetër që e besoj fort është shtimi i numrit të testimeve përmes gjurmimit.
Ky është konstatim edhe i kolegëve në botë, ka rënë transmetueshmëria dhe virulenca, por virusi vazhdon të qarkullojë. Koha e gjatë e ekspozimit bën të kemi raste të tjera pozitive dhe të sëmurë. Ndaj, duhet të kemi shumë kujdes. Pas 3 ditësh, situata besoj do të përmirësohet.
Të respektojmë në maksimum distancën fizike dhe vendosjen e maskave në ambiente publike krahas higjienës së duarve. Kaq mjafton që edhe nëse ekspozohemi ndaj virusit, të mos sëmuremi, por të fitojmë imunitet”, shprehet mjeku Pipero.