33 gjyqtarë dhe prokurorë kanë paraqitur kandidaturën për të qenë pjesë e Këshillit të Lartë Gjyqësor(KLGJ) dhe Këshillit të Lartë të Prokurorisë(KLP), nga rreth 700 gjyqtarë dhe prokurorë që ka sistemi aktual i drejtësisë.
Dje, 16 janar ishte fundi i afatit kohor për paraqitjen e kandidaturave dhe konstatohet një interes i ulët i komunitetit të gjyqtarëve dhe prokurorëve për të qenë pjesë e dy organeve më të rëndësishme të sistemit të reformuar të drejtësisë në vend. Me mbylljen e aplikimeve, pritet që Gjykata e Lartë dhe Prokuroria e Përgjithshme të nisin brenda pak ditësh verifikimin e kandidaturave.
Ligji “për organet e qeverisjes së sistemit të drejtësisë” parashikon që kandidatët për KLGJ dhe KLP, bashkë me kërkesën për aplikim të dorëzojnë edhe dokumentet e kërkuara ne zbatim te ligjit te Vetting-ut.
Përfundimi i kësaj procedure shënon dhe çeljen e garës mes tyre. Sipas ligjit, gjatë mandatit, prokurorët dhe gjyqtarët do të ushtrojnë vetëm detyrën e anëtarit të KLGJ dhe KLP, dhe ne përfundim te saj do të kthehen në vendin e mëparshëm të punës.
Në fund të afatit të caktuar për dorëzimin e kërkesave, kanë shfaqur interes për të qenë pjesë e KLGJ-së 14 gjyqtarë, që do te konkurrojnë mes tyre për 6 vende nga 11 që ka organi që do të qeverisë gjyqësorin.
Një interes më i lartë konstatohet në garën për Këshillin e Lartë të Prokurorisë(KLP), ku kanë paraqitur kandidaturën 19 nga 320 prokurorë që ka aktualisht sistemi i akuzës.
Nga prokuroria e përgjithshme janë tre kandidatë, katër janë nga prokuroritë e Apelit, ndërsa pjesa tjetër iu përkasin prokurorive të rretheve, ku kryeson Prokuroria e Tiranës.
/ata/
