Ambasadori amerikan: Populli shqiptar pret arrestimin e krerëve të bandave të drogës, por edhe të zyrtarëve të lartë nga e majta dhe e djathta.
Ambasadori amerikan i bën thirrje popullit shqiptar të rrisë pritshmëritë dhe presionin ndaj politikës për të kryer reformën në drejtësi në Shqipëri. I ftuar në një aktivitet për antikorrupsionin, ambasadori i SHBA-së, Donald Lu ka ritheksuar rëndësinë që ka zbatimi i reformës në drejtësi në Shqipëri. Ai ka evidentuar faktin se politikanë të së majtës dhe të djathtës janë të trembur nga kjo reformë, pasi pritet që institucionet e reja që u miratuan në kuadër të reformës në drejtësi, të çojnë në burg, krerët e bandave të drogës dhe krimit të organizuar bashkë me politikanë të lartë të korruptuar, të së majtës dhe të djathtës.
“Duhet të prisni që politikanë të lartë të korruptuar nga e djathta dhe e majta do të përballen me drejtësinë. Duhet të prisni që kontrabandistë droge, krerë të krimit të organizuar dhe krerë të gjykatës të korruptuar të jenë të frikësuar. Shohim prova se këta persona janë të friksuar dhe po përpiqen të luftojnë kundër kësaj lufte”, tha Lu.
Në mbyllje të fjalës së tij, Lu ka paraqitur gjyqtarët dhe prokurorët specialë të SHBA-së, të cilët janë tashmë në Shqipëri për të ndihmuar kryerjen e kësaj reforme. Është fjala për gjykatesën kroate Koraljka Bumci që vjen nga BE, për prokuroren Florentina Mirica që vjen nga SHBA-të, për prokurorin federal të SHBA-së, Mark Gjonaj, agjenti special i FBI-së, Robert Beckman.
