Grupi parlamentar i PD-së vendos: Nuk marrim pjesë në Parlamentin e krimit
Pa kaluar dy javë nga kthimi në Kuvend, opozita është kthyer sërish tek bojkoti ndaj Kuvedit. Grupi parlamentar i PD-së vendosi sot të bojkotojë Parlamentin. “Nuk marrim pjesë në Parlamentin e krimit”, ky është argumenti që ka opozita për të bojkotuar Kuvendin.
Shkak për vazhdimin e bojkotit duket se është bërë vendimi i Byrosë Parlamentare për të përjashtuar Berishën për dhjetë ditë nga Kuvendi. Grupi parlamentar i PD-së kishte kërkuar kthimin e këtij vendimi duke kërcënuar me bojkot.
Deputetët e opozitës munguan sot në mbledhjen e Komisionit të Ekonomisë, ku po diskutohet projektligji për kontabilistët. Dy ditë më parë, opozita kërkoi të kthehej vendimi për dënimin e Berishës ose në të kundërt paralajmëroi sërish kthim në bojkot. Byroja parlamentare vendosi të përjashtojë Berishën për dhjetë ditë nga Kuvendi pasi ai bëri një deklaratë e cila konsiderohet antikushtetuese nga shumica. Berisha tha se shqiptarët duhet të armatosen për t’u vetëmbrojtur në kushtet kur ata kërcënohen nga krimi ndërsa sipas tij, shteti është palë me krimin.
