Në një vendim skandaloz dhe tejet të dyshimtë, Gjykata e Tiranës ka dënuar për shpifje ish-kryeministrin Sali Berisha, për padinë që kryeministri Edi Rama ka bërë ndaj tij 4 muaj më parë. Berisha u dënua me gjobë prej 500 mijë lekësh për shpifje. Vendimi në favor të kryeministrit Edi Rama u dha nga gjyqtarja Marjana Shegani.
Postimi, për të cilin u gjobit Berisha, është një analizë e ish-kryeministrit e botuar në Facebook, ku ai thotë se negociatat e Shqipërisë me BE-në nuk do të hapen për shkak të dy ish-ministrave të Brendshëm, Tahiri e Xhafaj, që sipas Berishës janë të inkriminuar.
Berisha është paditur nga kryeministri Edi Rama edhe për një tjetër akuzë, atë se Rama po u shiste detin grekëve. Rama ka deklaruar më herët se ka depozituar në gjykatë 40 padi ndaj opozitës për shpifje të artikuluara nga ish-deputetë të opozitës, prej të cilëve kërkon dëmshpërblim në shumën e 100 mijë lekëve.
Vendimi i sotëm është qartazi pararendje e asaj që do të ndodhë me fjalën e lirë në këtë vend nëse paketa “Anti-shpifje” e miratuar pak ditë më parë në parlament me forcën e kartonit të Rilindjes do të hyjë në fuqi.
Vendimi i sotëm i gjykatës nuk është gjë tjetër po ashtu veçse kurorëzimi me sukses i rikthimit në fuqi të Nenit famëkeq 55 të regjimit komunist, në bazë të të cilit diktatura burgosi me qindra, në mos mijëra qytetarë shqiptarë, të cilët shprehnin mendimin e tyre të lirë kundër sistemit totalitar nën akuzën bajate “agjitacion e propagandë”.
Ky vendim është po ashtu në vazhdën e gjyqeve dhe ligjeve që kufizojnë lirinë e shprehjes, kundër të cilave është shprehur BE dhe KE, si dhe nje numër i madh i shoqatave ndërkombëtare të gazetarisë.
Jo më larg se pak ditë më parë, e njëjta gjykatë dha dënime penale për ish-deputetin e PD-së, Ervin Salianji, dhe gazetarin Jetmir Olldashi, pa denoncimin e të cilëve vëllai trafikant i ish-ministrit Fatmir Xhafaj, Agron Xhafaj do të të endej akoma i lirë. Këto vendime, tashmë pa ekuivok janë tentativa e radhës e kryeministrit Edi Rama që përmes kontrollit që ushtron ndaj gjyqtarëve dhe gjyktave të shantazhuar përmes vetingut, të mbyllin zërat kundër.
E së fundmi mund të thuhet pa frikë se kjo seri zhvillimesh dëshmon edhe njëherë se Edi Rama po godet çdo pushtet në Shqipëri, duke filluar nga ai i votës, të cilën e blen dhe e shet përmes mafiozëve që i ka kthyer në bashkë-ortake në pushtet, për të vazhduar me drejtësinë e për ta mbyllur me pushtetin e 4-ët që është media.
/Syri.net
