Kryetari i Bashkisësë Tiranës , Erion Veliaj deklaroi sot në ambientet e “Tirana Fan Zone” në sheshin “Nënë Tereza” se do të rindërtojë nga e para pallatin e sportit ‘Asllan Rusi’”, ndërsa parku olimpik do të jetë gati këtë vjeshtë, pjesa e lojërave me dorë.
Kryetari Veliaj ishte i pranishëm në Festivalin e Mini-Volley për fëmijë i cili u zhvillua nga Federata Shqiptare e Volejbollit.
Kreu i Bashkisë së Tiranës vlerësoi angazhimin e të gjithë fëmijëve për t’u marrë me sport dhe theksoi se kjo është mënyra më e mirë për një jetë të shëndetshme.
Ai falenderoi prindërit që kanë sjellë fëmijët në këtë Festival dhe u kërkoi atyre që të bëjnë edhe një hap tjetër në drejtim të një jete të shëndetshme, siç është edhe regjistrimi në një kurs volejbolli, futbolli, basketbolli, taekondoje apo çfarëdo sporti tjetër.
Festivalin e ndoqi nga afër Presidenti i Federatës Evropiane të Volejbollit, Aleksandër Boriçiç, si dhe zëvendëspresidenti, Ozkan Mutlugil, i cili është njëkohësisht President i Federatës turke të Volejbollit.
