Bashkia e Tiranës ka rikonstruktuar Shkollën e Kuqe në Tiranë, duke ofruar kushte më të mira mësimore për 1 mijë nxënës.
Kryebashkiaku Erion Veliaj, tha se viti i ri shkollor do ta gjejë Tiranën me katër shkolla të reja, të cilat do të ndikojnë në uljen e ngarkesës në shkollat ekzistuese, çka do të shoqërohet edhe me një cilësi më të mirë në mësimdhënie.
Veliaj theksoi se veç katër shkollave që përfundojnë këtë vit do të nisë shumë shpejt edhe projekti tjetër madhor, ai për ndërtimin e 16 shkollave të tjera.
“Shkollat e reja nuk do të ofrojnë vetëm kushte më të mira mësimdhënie, por edhe staf profesional. Në bashkëpunim me DAR-in po punohet që mësuesit që dalin të parët në konkurse të japin mësim pikërisht në shkollat e reja”, është shprehur kryebashkiaku Veliaj.
Veliaj nënvizoi se për të ruajtur cilësinë dhe për të shpërndarë ngarkesën nga shkollat ekzistuese nuk do lejohen që drejtorët e tyre të bëjnë regjistrime mbi kapacitetin.
Gjithashtu krybashkiaku dha edhe një lajm tjetër të mirë për të gjithë nxënësit me rezultate shumë të mira, Bashkia e Tiranës këtë vit do të japë 3000 bursa për të gjithë nxënësit që dalin me 10-a në mësime.
