Kryebashkiaku Erion Veliaj ka deklaruar se në dy vitet në vijim Bashkia e Tiranës do të shtojë ritmin e investimeve në zonat rurale.
Gjatë inspektimit të rrugës së re që lidh fshatin Allushaj me rrugën kryesore të Zall-Herrit, Veliaj njoftoj se kemi një plan shumë ambicioz, për t’i dhënë një marsh të pestë edhe fshatit, ashtu siç u kemi dhënë zonave urbane të Tiranës.
Veliaj theksoi se ky investim është dëshmi e faktit se për Bashkinë e Tiranës nuk ka dallim mes qytetit dhe fshatit, kur bëhet fjalë për investime dhe për cilësinë e tyre.
Ai nënvizoi se falë investimeve, por edhe vizionit të Bashkisë Tiranë, fshati po merr gjithnjë e më shumë vëmendje, jo vetëm të atyre që duan të kalojnë në fshat, por edhe të investojnë për zhvillimin e bujqësisë dhe në mënyrë të veçantë të agro-turizmit.
