Kryebashkiaku Erion Veliaj ka prezantuar Tiranën përmes 5 historive njerëzore në TEDx Prishtina.
Veliaj u ndal në këto histori ku njerëzit e thjeshtë janë protagonistë të ndryshimeve që ndodhin në kryeqendrën e shqiptarëve.
” Ylli, ose siç njihet ndryshe Ylli i peshkut, është një nga sipërmarrësit e Pazarit të Ri, një projekt që filluam ta transformonim para pak muajsh me idenë për t’i rikthyer Tiranës një pjesë të vjetër të saj, duke harruar se disa njerëz si Ylli e kishin jetën të lidhur me pazarin, pavarësisht se ky ishte degraduar. Kur i thamë Yllit se ky vend duhet rikualifikuar, ai mobilizoi dhe drejtoi grupin e protestës aty, duke na thënë se Pazarin e duam siç është. Sot Ylli nuk është më një nga 20 protestuesit, por një nga 1020 vetët që po ushqehen e bëjnë biznes aty”, tha Veliaj.
Gjithashtu Veliaj tregoi edhe shembullin e pashoq që dha për komunitetin një ish i përndjekur politik, që paratë e fituara nga dëmshpërblimi i shpenzoi për të ndryshuar fasadën e një pallati komunist të dalë boje.
“Historia e të përndjekurve në Shqipëri u referohet rreth 20 mijë vetëve që kanë bërë burg gjatë kohës së komunizmit, kryesisht për idetë e tyre. Gjatë 25 viteve të tranzicionit në Shqipëri gjithmonë abuzohet me këtë kategori, por më në fund në ministri vendosëm që kjo punë duhet mbyllur tani, në gjeneratën tonë, jo nesër. Unë e kisha harruar si histori, menduam që duke bërë pagesat u zgjidhën edhe dramat njerëzore apo historitë që i shoqërojnë ato, derisa një ditë dikush më shkruan se në një pallat në Tiranë, një ish i përndjekur i kishte investuar paratë e dëmshpërblimit për rikonstruksionin e gjithë pallatit, duke krijuar një energji të jashtëzakonshme në komunitet. Kështu thamë: ja pra, Shqipëria bëhet, edhe me dikë që është 91 vjeç”, u shpreh Veliaj.
Veliaj ndan edhe kundërshtime të projekteve në rradhët e qytetarëve dhe shoqërisë civile.
“Njoh shumë politikanë që mendojnë se detyra numër një është të jenë në debatet televizive në darkë, ditën e enjte. Nuk është kjo. Detyra numër një është të marrin mendime. Ngatërresa kryesore që bëjnë shumë njerëz në angazhim publik është që ngatërrojnë një minorancë të zhurmshme me një shumicë të heshtur. Kjo është arsyeja pse shumë herë gjëra të guximshme nuk kanë ndodhur në Shqipëri e Kosovë, se tuten nga një minorancë që bën zhurmë dhe nuk e kemi durimin ta sqarojmë një herë, dy herë, tre herë, ta ndërtojmë një herë, tre herë, 7-8 herë, derisa në fund civilizimi të fitojë dhe të gjejmë gjuhën e përbashkët për të ecur përpara”, ka deklaruar Kryebashkiaku.
