Bashkia e Tiranës dhe Agjencia e Parqeve dhe Rekreacionit vijojnë gjelbërimin e rrugëve dytësore te Liqeni i Thatë, duke mbjell 1000 pemë të reja.
Kryebashkiaku Veliaj tha se ky projekt do të vijojë përgjatë gjithë unazës së jashtme të Tiranës, që është edhe kufiri i Pyllit Orbital.
Kreu i Bashkisë theksoi se projekte të tilla rrisin vlerës e pronës dhe në të njëjtën kohë përmirësojnë anën estetike të qytetit.
“Do të vazhdojmë intensivisht me ketë projekt, deri në muajt e parë të vitit tjetër dhe pranverës, ndaj vazhdoj të ftoj të gjithë qytetarët, si ata që dhuruan 1000 pemë sot, si ata që ndoshta do të dhurojnë vetëm një pemë për një fëmijë të sapolindur nesër. Është “paja” që i lëmë qytetit tonë. Jemi apo jo në Bashki të Tiranës, për 100 vjet, këto pemë do jenë këtu dhe besoj se do të jenë trashëgimia më e mirë që kjo gjeneratë administratorësh mund t’i lërë qytetit të Tiranës”, tha Veliaj.
