Në një konferencë që po mbahet nga Instituti i ish-të Përndjekurve, kryetari i bashkisë së Tiranës, Erion Veliaj tha se është e rëndësishme dhe domosdoshmëri ngritja e një memoriali në nder të sakrificës për të përndjekurit.
Veliaj: Si shpjegohet që në një vend ku është folur për antikomunizmin nuk është gjetur deri më sot për të bërë të mundur ngritjen e një monumenti që të simolizojë vuajtjet e të përndjekurve. Një pjesë e madhe e rrugëve sot kanë emrat e personave anonim, ose që janë sot në burg për krime. Ngritja e një monumenti në Tiranë është domosdoshmëri. Do te vendoset në një nga qendrat policentrike.
Veliaj tha gjithashtu se ligji i dosjeve ka kaluar në parlament, ndërsa i bëri thirrje deputeteve që ti kushtojnë rëndësi, pasi ky ligj është jetik.
I pranishëm në takim ishte edhe ministri i Mirëqenies Sociale dhe Rinisë, Blendi Klosi i cili tha se do të ngrihet një zyrë për gjetjen e të zhdukurve.
Klosi: Qeveria ka ndërtuar urën e bashkëpunimit me komisionin ndërkombëtar për personat e humbur. Rëndësi të veçantë iu kushtua konferencës së donatorëve me qëllim gjetjen e personave të zhdukur. Do të bëjmë të gjitha përpjekjet që kjo zyrë të ekzistojë.
Edhe Avokati i Popullit Igli Totozani vlerësoi ngritjen e këtij memoriali, duke theksuar se fillimisht duhet konsultuar. Ai tha se kultura komuniste është prezente akoma dhe sot.
Totozani: Kultura duhet mundur me kulturë. Miratimi i këtij memoriali do të kundërshtojë mbijetesën e vazhdueshme të kulturës komuniste në Shqipëri.
