Kreu i Bashkisë së Tiranës Erion Veliaj ka nisur sot një dëgjesë me arkitektë dhe inxhinierë lidhur me atë që do ndodhë me Teatrin Kombëtar.
Në fjalën e tij Veliaj u shpreh se nuk është e rëndësishme që të dëgjohen vetëm artistët, po dhe urbanistë dhe njerëz të tjerë të fushës.
Veliaj tha se tashmë janë ulur tonet, duke iu referuar këtu takimin që pati me artistët, dhe pas këtij takimi sipas tij duhet negociuar sesa dhoma do të ketë Teatri i ri.
‘’Aktorët janë të rëndësishëm, por ashtu janë të gjithë, janë urbanistët, qytetarët. Ju falënderoj paraprakisht për durimin. E di që donit të gjithë të flisnit, por mendova se do ishte më e arsyeshme të flisnin fillimisht aktorët. Pjesa e dytë e dëgjesës iu dedikohet urbanistëve dhe artitektëve. Pse ndodh tani kjo dëgjesë? Kemi marrë një propozim për të zhvilluar atë zonë.
Po flasim për një arkitekt yll, që ka vënë firmën e vetë në disa nga ndërtimet më të mira në botë. Pse po ndodh tani? Siç e kërkon legjislacioni shqiptar, siç ka ndodhur me parlamentin dhe të tjerat. Të hapim një negociatë. Bashkia të jetë pala që e merr në shqyrtim.
Pasi të kalojë kjo fazë, kalojmë aty ku mund të negociojmë. Kemi ulur tonet. Kjo do të thotë që është mëse normale që ne të flasim, t’i largohemi vulgaritetit. Duhet të kemi teatër të ri, por si do ta kemi? Sa dhoma do të jenë? Këto janë detaje që janë pjesë e një negocimi”, u shpreh Veliaj në nisje të fjalës së tij në takim.
