Bashkia e Tiranës i është bashkuar nismës së Kryqit të Kuq për dhurimin vullnetar të gjakut për fëmijët me talasemi, leukemi, tumor e të tjera patologji të rënda.
Pjesë e kësaj nisme u bë edhe kryetari i Bashkisë së Tiranës, Erion Veliaj, i cili ka theksuar se Tirana është solidare dhe se edhe në këtë rast do të dijë të tregojë veten duke ndihmuar shumë njerëz të cilët kanë nevojë për gjak.
Veliaj u shpreh se fushata të tilla shërbejnë jo vetëm për të kontribuar për pasurimin e bankës së gjakut por edhe për të sensibilizuar qytetarët që ta kthejnë dhurimin e gjakut në një kulturë të përhershme.
“Disa nevoja ne i kemi permanente, që kanë të bëjnë me fëmijët talasemikë që janë një numër fiks, që në qytetin e Tiranës duhet të marrin transfuzion gjaku në mënyrë periodike, disa nevoja pastaj mund të jenë në bazë të rasteve që ndodhin. Ne kemi aksidente, operacione ku gjithmonë lipset që banka e gjakut të jetë plot. Unë them që është shumë e rëndësishme që ne të punojmë për infrastrukturë në qytet por akoma më e rëndësishme të punojmë për kulture dhe kultura e dhënies së gjakut është një kulturë që frymëzon qytetarët të jenë më solidarë me njeri tjetrin”, u shpreh Veliaj.
