Kryetari i Bashkisë së Tiranës, Erion Veliaj shoqëruar dhe nga deputeti i PS, Pandeli Majko vlerësoi se investimi te çerdhet, kopshtet dhe shkollat janë investimi më i mirë për të ardhmen e vendit dhe shoqërisë.
Veliaj: Ajo që më bën më shumë krenar për nivelin e arritur, është fakti që ne kemi përfunduar kopshtin e 15-të nga 23 kopshte që kemi. Dhe besoj që deri në shtator kur ne të fillojmë zyrtarisht vitin mësimor do të kemi mbaruar me të gjitha kopshtet. Për herë të parë kemi sjellë të njëjtin standard, në mos më të mirë në institucionet publike se sa në ato private. Partneriteti me “Down Syndrome Albania” është një mënyrë fantastike për të futur disa shërbime shtesë që nuk ia rrisin koston kopshtit, por që mbulohen nga partnerët tanë për engjëjt tanë që janë me nevoja të veçanta. Në kopshtet dhe çerdhet duke pasur dhoma të veçanta dhe duke pasur trajnerë dhe kujdestarë të specializuar për fëmijët me nevoja të veçanta. Mënyra se si rriten fëmijët deri në moshën 5 vjeç, ndikon në mënyrën se si rritet një qytet në 100 vitet e ardhshme.
Deputeti Pandeli Majko falenderoi Bashkinë e Tiranës për punën e bërë me çerdhet dhe me kopshtet, duke i dhënë Njësisë 5 një infrastrukturë arsimore dhe sociale moderne në vetëm një vit.
Majko: Sot që flasim të gjithë kopshtet e Njësisë 5 janë të rikonstruktuara fal një ndërmjetësimi shumë të fortë të Bashkisë së Tiranës dhe një pune shumë të mirë do të thoja të drejtorisë përkatëse të bashkisë. Mendoj se janë duke bërë një punë të mrekullueshme.
Në kopshtin 31, në bashkëpunim me donatorët, janë mundësuar punimet e brendshme, të gjithë instalimet elektrike dhe hidraulike sistemimi i hapësirës së gjelbër dhe rikonstruksioni i plotë i të gjithë fasadës.
