Krahas investimeve në rrugë të reja, kënde lojërash, shkolla, Bashkia e Tiranës po i jep vëmendje edhe përmirësimit të infrastrukturës për dije e kulturë.
Kryebashkiaku, Erion Veliaj, ka inspektuar sot punimet që po kryhen në bibliotekën e Njësisë 7, ku theksoi se investime të tilla janë garanci për të ardhmen e qytetit.
“Sot jetojmë në kohën kur njerëzit bombardohen nga celularët, ipod-ët, interneti, por harrojmë që njerëzit bëhet qytetarë më të mirë falë librit, falë fokusit te kultura. Në Tiranë po ecim paralelisht me investime në infrastrukturë dhe investime në kulturë. Sa është e rëndësishme hapësira brenda pallateve, brenda lagjeve e rrugëve tona, aq e rëndësishme është edhe hapësira brenda mendjes tonë sepse kjo garanton që investimet e bashkisë nuk vandalizohen, që mbahen pastër, që nuk ndotin mjedisin”, shtoi Veliaj.
Veliaj theksoi se deri në fund të mandatit do të përfundojë të gjitha bibliotekat e lagjeve, me qëllim që ato të shërbejnë jo vetëm si qendra leximi, por edhe si qendra komunitare, ku banorët mund të zhvillojnë aktivitete të ndryshme.
