Pamjet tragjike të një burri me ngjyrë i cili vdiq duke kërkuar mëshirë nën gjurin e një oficeri të policisë kanë shkaktuar reagime të ashpra e deri te protesta të dhunshme në qytetin e Minneapolis në SHBA.
Në video dëgjohet viktima George Floyd, i cili i thotë disa herë policit që nuk mund të marrë frymë dhe se i dhemb stomaku. Por pavarësisht lutjeve, efektivi nuk e heq gjurin nga qafa e tij. Për këtë ka reaguar edhe presidenti amerikan, Donald Trump.
“Ngjarje shumë shumë e dhimbshme, shumë shumë e trishtë. Do të kthehemi dhe do ta shikojmë raportin e plotë, por është vërtetë një ngjarje shumë e dhimbshme”, deklaroi Trump.
Rreth 24 orë nga vdekja e 46-vjeçarit, mijëra protestues u përleshën me forcat e rendit në Mineapolis. Shumë prej tyre u mblodhën për të protestuar pikërisht në vendin ku ai u arrestua të hënën në mbrëmje. Disa protestues hodhën gurë në drejtim të policëve, të cilët u përgjigjën me gaz lotsjellës.
Vdekja e Floyd shkaktoi reagime të shumta edhe të personazheve publike në SHBA.
